કેરળ આધારિત મણપ્પુરમ ફાઇનૅન્સ લિમિટેડે જણાવ્યું કે તેને આરબીઆઈ તરફથી બેિન કેપિટલ દ્વારા કંપનીની પેઇડઅપ ઇક્વિટી અને કન્વર્ટિબલ ઇન્સ્ટ્રુમેન્ટ્સના કુલ ૪૧.૬૬ ટકા સુધીના અધિગ્રહણ માટે અંતિમ મંજૂરી મળી છે. આ મંજૂરી પછી બેિન કેપિટલને નવા પ્રમોટર તરીકે ઓળખવામાં આવશે અને હાલના પ્રમોટરો સાથે સંયુક્ત નિયંત્રણ મળશે.
કંપનીના જણાવ્યા મુજબ, બોર્ડની પુનર્ગઠન પ્રક્રિયા હાથ ધરાશે જેમાં બેિન કેપિટલના પ્રતિનિધિ ડિરેક્ટરોનો સમાવેશ થશે. માર્ચ ૨૦૨૫ના કરાર મુજબ બેિન કેપિટલ દ્વારા આશરે રૂ. ૪૩૮૫ કરોડનું રોકાણ કરવામાં આવશે. આ રોકાણ હેઠળ ૧૮ ટકા હિસ્સો પ્રિફરેનશિયલ આધારિત ઇક્વિટી અને વોરન્ટ્સ દ્વારા પ્રતિ શેર રૂ. ૨૩૬ના ભાવેથી આપવામાં આવશે.
આ વ્યવહારે જાહેર શેરહોલ્ડરો પાસેથી વધારાના ૨૬ ટકા હિસ્સા માટે ફરજિયાત ખુલ્લી ઓફર પણ શરૂ કરી છે, જેમાં ભાવ પ્રતિ શેર રૂ. ૨૩૬ નક્કી થયો છે. કંપનીના એમડી અને સીઇઓ વી. પી. નંદકુમારે જણાવ્યું કે આ મંજૂરી ભાગીદારીમાં મહત્વપૂર્ણ પડાવ છે અને કંપનીના ગવર્નન્સની શક્તિને દર્શાવે છે.
તેઓએ ઉમેર્યું કે બેિન કેપિટલના સંયુક્ત નિયંત્રણથી કંપની હવે તેના મુખ્ય ક્ષેત્રોમાં વૃદ્ધિને વધુ ગતિ આપી શકશે, ટેકનોલોજી અને જોખમ વ્યવસ્થાપન ક્ષમતાઓમાં સુધારો કરી શકશે અને રાષ્ટ્રીય સ્તરે શાખા નેટવર્કના વિસ્તરણને મજબૂતી આપી શકશે.
બજાર વિશ્લેષકોના કહેવા પ્રમાણે, આ વ્યૂહાત્મક રોકાણ ગોલ્ડ લોન ક્ષેત્રમાં મણપ્પુરમ ફાઇનૅન્સની સ્થિતિને વધારે મજબૂત બનાવશે અને મૂડી આધાર સુધારવાથી કંપનીના આવનારા વિસ્તરણ યોજનાઓને વેગ મળશે.
